Sa pa ta dwe etonan pou n aprann moun vin achte plis kantite ti goute tankou pòpkòn, pretzèl ak chip pòmdetè, pandan pwopagasyon Kowonaviris la nan kòmansman mwa mas, dapre NPR . Men, menm se tout nasyon ann antye k ap eseye plati koub la akoz viris sa a, kon sa tou fanmi ou ta dwe eseye diminye enfliyans sèten ti goute ki pa menm bon pou sante. Menm lè sèten ti goute ka bon pou timoun yo paske yo ka kenbe yo ak yon ti enèji ant repa regilye yo, twòp ti goute sitou ak manje ki pa bon pou sante n kapab deranje vant nou epi lage n nan kouri. Men, si timoun yo jwenn bon manje nòmal nan lè nòmal, ti goute ka jwe yon wòl enpòtan nan jere grangou timoun yo, nna ranfòse nitrisyon epi ba yo yon bagay pou yo fè pandan tout tan y ap pase anndan nan kay la. Yon ti goute timoun yo jwenn nan bon moman an kapab menm kenbe timoun ki pi piti yo pou yo pa vin tèlman grangou, yo vin ap fè degoutan. “Li enpòtan pou yo mete konsiy sou fason timoun yo dwe pran ti goute, menm jan tou ak fason pou yo manje manje regilye pandan tout jounen an. Se kon sa ni timoun ni granmoun p ap abize fason y ap pran ti goute yo”. Sa a se pawòl Lana Chehabeddine, kowòdonatè pwogram pou FLIPANY, ki gen misyon pou batay kont obezite timoun ak anvi manje yo. Sa ka fèt nan konsantre nou sou preparasyon manje ki bay sante, ki sennesof, sou edikasyon fizik ak bon aniwònman nan plas travay nou. Kòm anpil nan ti goute timoun plis resevwa konn pa gen twòp valè pou nitrisyon, li enpòtan pou ou asire w ou fè bon chwa nan ti goute w ap bay timoun nan.
Ti goute sansib
Moman pou pran ti goute se yon bèl opòtinite pou ogmante kantite fwi ak legim timoun yo manje, dapre yon etid an 2019 ki te dekouvri timoun ki manje ti goute ant 2 repa, yo ka tou jwenn fwi ak lòt eleman ki bon pou sante, yo te ka pa jwenn otreman. Pou moun ki difisil nan chwazi ti goute, yo ka pran fwi ak legim epi matche yo ak pwodui ki fèt ak lèt oubyen pwodui ki ranple sa k fèt ak lèt (tankou rezen ak fwomaj), pwoteyin san gra (tankou seleri ak manba) oswa sereyal ak gren antye ansanm ak pen (tankou sandwich fig ak pen gren antye). Li pi fasil pou fè ti goute rapid, ki bay sante lè ou kenbe yon seri manje ki bay sante sou lamen nan kay la, byenke sa ka yon defi pou jwenn yo achte toutan tout kote pandan pandemi an. Nan lide sa a, nou ka pale de diferan kalite legim kri ak fwi, tranpe yogout, oumous ak baton fwomaj. “Anpil manje ki chaje nourisan (tankou vitamin, pwoteyin, fib) se bèl bagay pou ti goute”, dapre sa Chehabeddine eksplike. “Sa gen ladan yon varyete manje fre — tankou pwa gous ak piman zwazo ki tranpe nan oumous oswa salsa fre — ak lòt manje tankou yon ponyen nwa miks, fwi sèk, pwa chich griye, pòpkòn, oliv ak alg seche.
Planifye moman yo se sa ki kle
Se pa sèlman yon kesyon ki ti goute ou bay timoun nan — se sitou ki lè ou ba li l, dapre ekspè yo. “Vant timoun pi piti e yo pa ka manje menm kantite manje avè n pou chak repa, kon sa yo dwe manje pi souvan”. Sa a se eksplikasyon dyetetisyèn Elizabeth Davenport nan New York Times.
“Yon timoun ki toujou ap mande pou yo ba l ti goute, se plis kapab akoz l ap grandi epi l grangou. Ba li manje ak ti goute dapre jan w planifye sa pou tout jounen an, men tou atann ou aske timoun yo kapab mande plis ti goute pase anvan akoz y ap pase plis tan lakay yo. Yon prensip san fay se ba yo ti goute kèk èdtan apre yon repa epi ba yo yon lòt apeprè youn a dez èdtan anvan pwochen repa a. “Yon konsèy itil: lè w fè sa kon sa, li pèmèt yo jwenn yon ti goute ant de repa. Men si sa pa mache, ou ka kite timoun nan pran sèten ti goute ki bay sante (tankou fwi ak legim fre) kantite fwa yo vle, depi se pa nan menm lè ak repa nòmal yo.” Se sa Chehabeddine ki reprezante FLIPANY esplike. Menm lè sa, ou dwe veyatif konsènan ki kantite timoun yo ap pran. Chehabeddine sijere pou fè timoun yo bwè anpil dlo pou kenbe vant yo plen epi y ap mande mwens ti goute! Li di tou pou n mete ti goute yo nan yon bòl oswa yon lòt veso, olye pou w kite timoun nan annik chire pake a epi manje l. “Lè kon sa, li difisil pou konnen ki kantite yo vrèman manje. Kontwole kantite pou yo manje chak fwa, se kle! ”
